رمضان "جانا" لكن حملة (اخسر وزنك.. تكسب صحتك)
لسه "معانا"... رمضان السنة دي شكل تاني، وعلشان كده دكتور "محمد أبو
الغيط" طلب مننا إننا نوجه دعوة لكل قراء "بص وطل" إنهم ينضموا إلى ريجيم
رمضاني خاص.
والنتيجة هتشوفوها بعد الشهر الكريم، وهي دعوة
مفتوحة للكل علشان نتسابق في خسارة الوزن الزائد اللي طبعاً تأثر بموسم
الإجازات والمصايف..
ابدأوا في الريجيم مع أول أيام الشهر الفضيل
وابعتوا لنا النتيجة أولاً بأول، ولو عندكم مشاكل أو استفسارات دكتور "أبو
الغيط" هيرد عليها فوراً... يلا نبدأ ونسأل...
هل ممكن الصيام يساعد في إنقاص الوزن؟
شرع الله الصيام للعبادة والتقرب إليه، وليشعر المسلم بطعم الحرمان
والجوع الذي يشعر به الفقير والمحتاج فيكون أكثر عطفاً ورفقا
بالمحتاجين... يرتبط بالصيام الإكثار من التعبد والصلاة والتهجد والقيام..
رمضان عملياً لو طبقناه صح هو قلة أكل ورياضة أكثر.. يعني من المفترض إن
الشخص المتدين جدًّا يخرج من رمضان وهو خسران وزنه ومحقق على الميزان رقم
كويس في النزول.
رمضان ريجيم "رباني" ونظام رياضي كفيل بإحراق أي سعرات حرارية زائدة..
بلغة الشباب بنقلل عدد ساعات "الأنتخة" وطبعاً بنقلل "اللخبطة" في الأكل
فمن الطبيعي إننا نخس.
وبالحسابات من يطبق مبادئ الصيام على حق وبجد؛ صوم وصلاة ممكن يخسر من وزنه على الأقل أربعة كيلو بمعدل كيلو كل أسبوع.
لكن ليه على الرغم من الصيام وكثرة الصلاة إلا إننا في رمضان بنخرج منه أتخن من الأول؟!
رمضان الفعلي -أو ما نمارسه في الواقع- مختلف تماماً عن هدف الصيام؛
لأننا تعودنا على مجموعة من العادات الرمضانية هي السبب في زيادة وزننا...
أولى هذه العادات هي "اللمة" اجتماع الناس والعيلة والأصحاب والجيران،
وبالطبع ما فيش مناسبة أحسن من "لمة" الفطار أو السحور، وطبعاً ما ينفعش
نجتمع من غير ما ناكل حتى الناس لما بيتبادلوا الهدايا والمجاملات بتكون
حلويات وأكلات..!!
طبعا أنا مش ضد هذه العادات الحميمية الجميلة؛ لكن تعالوا نقترح حاجة
تانية ونبدأ ننشرها ونجرّب ونشوف.. إيه رأيكم لو كانت "لمتكم" على صلاة
التراويح أو التهجد أو القيام.. أكيد هنحصل على ثواب الجماعة، وفيها تقرب
إلى الله وتقارب بين الناس ورياضة، وكمان من غير ما ناكل كثير.. وبعد كده
نتسحر السحور العادي.. فول وزبادي وجبنة وبيض وعيش وعصير ولبن..
وكمان بدل ما تكون الهدايا أطباق حلويات نخليها كتب وحاجات للبيت أو
هدية مفيدة لأصحاب البيت اللي عاملين عزومة، وأكيد هيكونوا مجهزين
حلويات.. تخيلوا العزومة الواحدة بيكون صاحب العزومة مجهز ثلاث أصناف
حلوى، وكل ضيف بيجيب معاه صنف أو اثنين حلو هدية..!!!
أنا مش ضد إننا
نجتمع على الفطار والسحور علشان ناكل مع أهلنا وأصحابنا وجيرانا.. المشكلة
مش في العزومة لكن في نوعية المأكولات الدسمة والأطباق اللي تختارها علشان
تكرم ضيوفها من وجهة نظرها..
لماذا يكون التركيز في رمضان على الحلويات؟
ست البيت وهي بتفكر في العزومة؛ وخاصة وهي صايمة بتفكر وعندها انخفاض في
مستوى السكر في الدم "بسبب الصيام"؛ فتبدأ تتجه تلقائياً -وبدون وعي- إلى
الحلويات والمأكولات التي ترفع نسبة السكر في الدم.. وحتى وهي بتعمل
شوبينج وبتشتري طلبات مطبخها في رمضان أول حاجة بتشتريها الكنافة والقطايف
قبل اللحمة والفراخ والخضار... المخ بيفكر في السكريات الجاهزة اللي بمجرد
ما ناكلها تتحول فوراً إلى سكر في الدم.. وندخل في حلقة مفرغة لمدة ثلاثين
يوم. وعلشان نكرم ضيوفنا نعمل لهم أكل مليان دهون وسكريات ومكسرات....!!
وكمان بسبب الشعور الزائد بالجوع بنتناول كميات كبيرة دون أن نشعر
"بكم" و"نوعية" الأكل.. السرعة في الأكل يبطئ الإحساس بالشبع؛ فنكمل الأكل
بالحلويات في حين لو أكلنا "لحوم" وانتظرنا شوية هتتحول إلى سكر في الدم..
بالطبع الأكل بهذه الطريقة بيخلي الناس تشعر بالخمول وبتقل المعدة،
ورغبة النوم بعد الإفطار.. فالمحصلة أكل ونوم وأكيد هيفوتنا "صلاة" مهمة
اللي هي أصلاً هي الهدف الأساسي في رمضان... مش الأكل والنوم والمسلسلات!
رمضان الحقيقي العكس تماماً.
لو قدرنا نرجع لرمضان طبيعته
الإيمانية ونحقق الهدف اللي من أجله شرع الله الصوم... هو الاعتدال في
الأكل والتبرع بالباقي والمساهمة في موائد الرحمن ليأكل أكبر عدد من
الناس.. وبحسابات الريجيم اقتطاع عدد من السعرات الحرارية التي تعودنا
الحصول عليها وتوزيعها على مجموعة من الناس هم في أشد الاحتياج لهذه
السعرات.
لكن صعب نغير عاداتنا والعزايم في رمضان؟
التغيير أكيد مش في يوم وليلة؛ ولكن على قدّ ما نقدر ننشر هذه الفكرة؛
وخاصة إن الناس بتطلع من رمضان زيادة على الأقل خمسة كيلو من كثرة الأكل
والراحة؛ وخاصة بين الشباب... مهم نعمل بقول الله تعالى: {وَكُلُوا
وَاشْرَبُوا وَلا تُسْرِفُوا}، وأكيد هذا المعنى موجود في الإنجيل
والتوراة.. كل الأديان تَنْهَى عن الإسراف في الأكل؛ لأنه مضر بالصحة.
موضوع: يلّا نجرب عزومة جديدة × رمضان "ثواب وريجيم"..!! 
الثلاثاء سبتمبر 01, 2009 5:03 am